नायगाव/प्रतिनिधी : भगवान शेवाळे
जिल्ह्यातील सोयाबीन उत्पादक शेतकऱ्यांची खरेदी प्रक्रियेत दोन किलो कट्टीच्या नावाखाली आर्थिक लूट होत असल्याचा आरोप करत भाजपाचे प्रदेश कार्यकारिणी सदस्य बालाजी बच्चेवार यांनी जिल्हाधिकारी यांच्याकडे निवेदनाद्वारे तक्रार केली आहे. सोयाबीन खरेदीसाठी ५० किलो ८०० ग्रॅमची योग्य भरती पद्धत लागू करावी, तसेच संपूर्ण जिल्ह्यात जूट बारदानामध्ये एकसमान पद्धतीने खरेदी करण्यात यावी, अशी मागणी त्यांनी केली आहे.
नांदेड जिल्ह्यात दुष्काळसदृश परिस्थितीमुळे शेतकरी आधीच आर्थिक अडचणीत आहेत. अशा परिस्थितीत सोयाबीन विक्री करताना शेतकऱ्यांना योग्य मोबदला मिळण्याऐवजी वजनातील कथित अनियमिततेमुळे नुकसान सहन करावे लागत असल्याचे बच्चेवार म्हणाले.
सोयाबीन खरेदी करताना बारदान्यासह ५० किलो ८०० ग्रॅम वजनाची पद्धत लागू करण्याची मागणी त्यांनी केली असून,काही व्यापारी व बाजार समित्यांमधील खरेदी प्रक्रियेत ५२ किलो किंवा त्यापेक्षा अधिक वजन भरून त्यातून दोन किलो कट्टी वजा केली जात असल्याचा आरोप करण्यात आला आहे. या पद्धतीमुळे शेतकऱ्यांच्या सोयाबीनचे नुकसान होत असून, मोठा आर्थिक फटका बसत असल्याचे बच्चेवार यांनी म्हटले आहे.
या प्रकरणात जिल्हाधिकाऱ्यांनी तातडीने हस्तक्षेप करून जिल्ह्यातील सर्व कृषी उत्पन्न बाजार समित्यांना लेखी निर्देश द्यावेत, अशी मागणी निवेदनात करण्यात आली आहे. शेतकऱ्यांकडून नियमबाह्य कट्टी आकारली जाणार नाही, याची दक्षता घेऊन निर्धारित वजनपद्धतीनुसारच सोयाबीन खरेदी करण्याचे आदेश द्यावेत, असेही त्यांनी म्हटले आहे.
नियमांचे उल्लंघन करणाऱ्या व्यापारी व आडतदारांवर संबंधित कायद्यानुसार दंडात्मक कारवाई करावी, प्रत्येक बाजार समितीत वजनपद्धतीबाबत जनजागृती करणारे फलक लावावेत आणि शेतकऱ्यांच्या तक्रारींचे निराकरण करण्यासाठी हेल्पलाइन क्रमांक जाहीर करावा, अशा मागण्याही करण्यात आल्या आहेत.
