नायगाव/प्रतिनिधी : भगवान शेवाळे
विकासाच्या नावाखाली वनसंपदेचा बळी देण्याची सरकारची मानसिकता थांबली पाहिजे. भीमाशंकर परिसरातील सैदोंगर येथे प्रस्तावित जलविद्युत ऊर्जा साठवण प्रकल्पासाठी २३३ हेक्टरपेक्षा अधिक वनक्षेत्र आणि ३२ हजारांहून अधिक झाडे बाधित होण्याच्या मुद्द्यावरून राष्ट्रवादी काँग्रेस पक्ष शरदचंद्र पवार पक्षाचे नायगाव तालुकाध्यक्ष पांडुरंग शिंदे यांनी सरकारवर टीका केली आहे.
भारतीय वन सर्वेक्षणाच्या २०२३ च्या अहवालानुसार, महाराष्ट्रातील वनाच्छादन राज्याच्या भौगोलिक क्षेत्राच्या केवळ १६.५३ टक्के आहे. दुसरीकडे, IPCC च्या अहवालानुसार जागतिक तापमानवाढीचे संकट गंभीर होत आहे. अशा परिस्थितीत उरलेली नैसर्गिक वनसंपदा नष्ट करणे पर्यावरणासाठी धोकादायक असल्याचे शिंदे यांनी म्हटले.नाशिकच्या तपोवनातील प्रस्तावित वृक्षतोडीचा संदर्भ देत त्यांनी विकासकामांसाठी पर्यावरणाचा बळी देण्याच्या धोरणावरही प्रश्न उपस्थित केले. उद्योग उभारणीसाठी पर्यावरणीय संवेदनशीलता कमी असलेल्या पर्यायी जागांचा शास्त्रीय अभ्यास करावा आणि वनसंपदेचे नुकसान टाळावे, अशी मागणी त्यांनी केली.
“विकास हवा; पण निसर्गाच्या विनाशाच्या किंमतीवर नको. सरकारने वृक्षतोडीचा निर्णय तातडीने थांबवून पर्यावरणाचे संरक्षण करावे. अन्यथा भावी पिढ्यांना त्याची गंभीर किंमत मोजावी लागेल,” असा इशारा पांडुरंग शिंदे यांनी दिला.
